Стихотворение Сакена Сейфуллина

На казахском языке

Келіншектің бесік жыры

Әлди-әлди, ақ бөпем,

Ақ бесікке жат бөпем!

Жылама, бөпем, жылама,

Жілік шағып берейін,

Көк ала иттің құйрығын,

Жіпке тағып берейін!

Әлди-әлди, жанашым!

Алдыма алып шабайын,

Тойға кеткен әкеңді,

Қайдан іздеп табайын?

Әлди-әлди, аппағым!

Жылама, менің жүрегім,

Әкең жүр ғой малменен!

Жүрген шығар алысып

Шұнақ аяз карменен.

Кәртайғанда күтетін

Әкесі мен шешесін,

Қандай жігіт өскенде

Болар екен бөпешім?

Өңкей біздей зарлыға,

Кемдіктегі жарлыға,

Жаным менің ер жетіп,

Көсем болар ма екенсің?

Тақылдаған таңдайы,

Кере қарыс маңдайы.

Алмас тілді немесе,

Шешен болар ма екенсің?

Бұлбұлдай боп тілінен

Тәтті айтқанда қан тамған

Ақын болар ма екенсің?

Не болмас жүректі,

Күш, қайратты, білекті,

Кемшілікке көнбейтін,

Батыр болар ма екенсің?

Омырауы есіктей,

Ақ балтыры бесіктей,

Егінші боп өзгеге

Нұсқа болар ма екенсің?

Отқа темір кайнатқан,

Бұт балғаны ойнатқан,

Нанша илейтін темірді

Ұста болар ма екенсің?

Не болмаса жұмыскер,

Не өнерлі мініскер,

Саусақтары сүйріктей

Зергер болар ма екенсің?

Не қасқа атты Қамбардай,

Аш қылмайтын аң барда,

Құралайды көзге атар

Мерген болар ма екенсің?

Жақсы болып ер жетсе,

Бар үміті – қарағы,

Михнат шеккенсорлы ана

Ашпағаны қабағын.

Әлди-әлди, балашым!

Ұйқтатайын тербетіп...

Тілегім сен, құлыным,

Үміт ақта ер жетіп!..